20.12.12

მსუნაგების ნაძვის ხე

Approved by Natia Jinjolava


ჩემს საკუთარ ბინაში პირველი საკუთარი ნაძვის ხე შოკოლადებით რომ მქონდა მორთული სათამაშოების არქონის გამო, ერთხელ უკვე მოგიყევით. შარშან, ძველებური ტრადიციის მიხედვით, ნაძვის ხის საჭმელი სათამაშოებით მოკაზმვა უკვე შეგნებულად განვიზრახე და უნდა გითხრათ, რომ  შედეგმა გაამართლა. ჯერ ერთი, რომ ძალიან ლამაზი გამოვიდა და მეორე - ოჯახის წევრებთან ერთად სათამაშოების ანუ პეჩენიების ცხობა და სამი თხლის სიგრძის ჩურჩხელების ამოვლება ფრიად სახალისო პროცესი გამოდგა. წელს ჩემმა ყბადაღებულმა სიზარმაცემ მძლია და პეჩენიების კიდევ ერთხელ გამოცხობა შემეზარა (ექსპერიმენტები მიყვარს და ერთი და იგივეს კეთება კი მბეზრდება). მაგრამ იდეა ისე მომწონს, რომ ასე მარტივად ვერ შევეშვი (ბოლოსდაბოლოს, სახლში დასაწყობებულ სხვადასხვა ზომის 5 ნაძვის ხეს, რამე ხომ უნდა მოვუხერხო) და ცხობის საკმაოდ იოლი და გასართობი ალტერნატივა ვიპოვე.  მსგავსი სათამაშოების დამზადებას არც ბევრი ენერგია და არც პროფესიონალიზმი  და რაც მთავარია, ბევრი დრო არ ჭირდება. მოუხმეთ დაქალებს და ბაშვებს და გპირდებით, ცივი ზამთრის საკმაოდ უჩვეულო და მხიარულ საღამოს გაატარებთ.

ბატი-ბუტის გირლიანდა
დაგვჭირდება: 5-დან 10 ჭიქამდე ბატი-ბუტი, 1 ან მეტი ნემსი და თეთრი ძაფი. ბატი-ბუტის და ნემსების ზუსტი რაოდენობა და ძაფის სიგრძე, თქვენი ნაძვის ხის ზომასა და დამხმარეების რაოდენობაზეა დამოკიდებული.
უმარილო და დაუტკბილავი ბატი-ბუტი ჩაყარეთ დიდი ზომის ჯამში. თქვენთვის სასურველის სიგრძის ძაფი გადაზომეთ, გადაჭერით და გაუყარეთ ნემსში. თან გაითვალისწინეთ, ერთ უსაშველოდ გრძელ გირლიანდას 2 შედარებით მოკლე აჯობებს. მერე აიღეთ 1 ბატ-ბუტი და შუაში გაუტარეთ ნემსი, ბატი-ბუტი ძაფის ბოლოსკენ ჩააცურეთ (პირველ ბატი-ბუტს ძაფის ბოლო შემოახვიეთ და განაკვეთ, ასე თქვენი ბატი-ტუტის მძივი აღარ დაიშლება), მერე მეორე, მესამე და ა.შ. სანამ ძაფს მთლიანად არ შეავსებთ. მეორე თავიც გამონასკვეთ. ასე გააგრძელეთ სანამ თქვენთვის საურველი სიგრძი გირლიანდები არ დაგიგროვდებათ ან მასალა ანუ ბატი-ბტი არ გათავდება.

ნაძვის ხის წვერსართავი კარამელის ჯოხებისგან
კლასიკური პიტნის თეთრ-წითელი კარამელის ჯოხებით მორთული ნაძვის ხე ვის არ უნახავს კინოში მაინც, მაგრამ ჩვენ უფრო შორს წავიდეთ და კარამელის ჯოხებიგან ნაძვის ხის წვერსართავი ანუ წვერზე ჩამოსაცმელი სათამაშო დეკორაცია.
დაგვჭირდება: დაახლოებით 15 ცალი კარამელის ჩხირი, ცხელი პისტოლეტი, აკვარიუმის სილიკონი ან ნებიმიერი არატოქსიკური წებო თავისი პისტოლეტით, შოკოლადის პატარა წითელი დრაჟეები
ავიღოთ 2 კარამელის ჯოხი და მოღუნული ნაწილით ერთმანეთს მივატყუპოთ, ისე რომ ქვედა გრძელი ნაწილები ერთმანეთისგან ოდნავ დაშორებული (გაჩაჩხული) იყოს. ასე დავიჭიროთ ორი თითით და მეორე ხელით მოღუნულ ნაწილში დავაწებოთ. ასე გვეჭიროს, სანამ წებო არ გაშრება, მერე მესამე მივაწებოთ და ასე გავაგრძელოთ, სანამ 9 ჯოხისგან შემდგარ „გვირგვინს“ არ მივიღებთ, მორკალული მხარეებით ზევით და გარეთ და გაფარჩხული გრძელი მხარეებით ქვევით. დავრწმუნდეთ, რომ კარგად გაშრა და ფრთხულად გადავდოთ გვერდზე. მერე, თითო-თითოდ ავიღოთ დარჩენილი ჯოხები და ამოყირავებულად სათითაოდ შევაწებოთ გაფარჩუხლად მიწებებულ ჯოხებს შორის - ანუ მორკალული მხარით ქვევით და გრძელი მხარით ზევით - ისე როგორც სურათზეა. ჩვენი კონსტრუქცია საბოლოოდ რომ გამაგრდება, ყველა ჯოხს თავებში და ბოლოებში მივაწებოთ შოკოლადის წითელი დრაჟეები (შეგიძლიათ გამოიყენოთ წითელი "სკიტლსი" ან "ემენდემსი").


ნაძვის ხის სათამაშოები ციტრუსებისგან
ასეთი „სათამაშოები“ გარდა იმისა, რომ საკმაოდ ლამაზია, კარგი სუნიც ასდით და მთელ სახლს ზამთრისა და ახალი წლი არომატით ავსებენ.
დაგვჭირდება: ციტრუსები (მაგ.: ფორთოხალი, ლიმონი ან ლაიმი), დეკორატიული ატლასის ლენტები ან ლამაზი თოკი და პერგამენტდაფენილი საცხობი ფირფიტა
გავახუროთ ღუმელი 90°C-მდე. დავჭრათ ციტრუები თხელ რგოლებად. ნაჭრები შევამშრალოთ ქაღალდის ხელსახოცით და დავალაგოთ პერგამენტის ქაღალდდაფენილ (ან სილკონის ფირფიტაზე) საცხობ ფირფიტაზე. შევდგათ ღუმელში 2-3 საათით. ხილი უნდა გამოშრეს, ამიტომ „ცხობის“ ხანგრძლივობა მთლიანად ხილის სიწვნიანეზეა დამოკიდებული. ამიტომ ყოველ ნახევარ საათში ერთხელ შეამოწმეთ - შუა გამოშრობის პროცესში კი გადაატრიალეთ. ბოლომდე რომ დაჩირდება ჩვენი ციტრუსები, გამოვიღოთ ღუმელიდან და გავაგრილოთ. მერე სადგისით გავუკეთოთ ხვრელი და გავუყაროთ წვრილი ლენტი ან თოკი და ამ ლენტით ჩამოვკიდოთ ნაძვის ხეზე.

საუკეთესო სურვილებით, თქვენი მერი პიპინსი

0 კომენტარი.

19.12.12

"ოქროს სარაიას აგიშენებ, ჩემსა რომ მოვრჩები მერე"

Approved by Natia Jinjolava


დღეს მსოფლიო სიღარიბესთან ბრძოლის დღეს აღნიშნავს... და, დავფიქრდი: რა წვილი შემიძლია შევიტანო პირადად მე ამ მართლაც ძალიან საჭირო და საჭირბოროტო საქმეში? კაი, გავედი ქუჩაში და მათხოვარს მივეცი ლარი. ეშველა ამით რამე მის სიღარიბეს? მეტი არაა ჩემი მტერი. ან ჩემს მეზობელ პენსიონერს, რომელიც ორ კვირაში ერთხელ თვითონ მიკაკუნებს კარებზე და ხარკის სახით 2 ლარს მთხოვს, თავად მივაკითხო და რიგგარეშე რკინის მონეტა ჩავუკუჭო მუჭში? არა მგონია, რამე გამოვიდეს. მობილურზე ფული ჩავურიცხო უმუშევარ კურსელს, რომლისგანაც აგერ უკვე მეოცე SMS-ი მივიღე: „ტელეფონზე ლარი დამრჩა და 5 ლარი ჩამირიცხე. გკოცნი, გიო“... გეფიცებით, რომ მწერდეს მშიაო, ბაზარში დავიტვირთებოდი და მივქანდებოდი, მაგრამ ტელეფონზე ფულს პრინციპულად არ ჩავრიცხავ. მსგავსი თხოვნა, სიღარიბის კი არა, სითავხედის ნიშნია.
ბევრი ვიფიქრე თუ ცოტა - ხან ადამიანთა ყოფაზე ამიჩუყდა გული, ხან საკუთარ უსუსურობაზე და მივხვდი, რომ ამ, ანუ მსოფლიოს სიღარიბისგან გათავისუფლების საქმეში, სხვისი არ ვიცი და მე, სასწაულის გარდა ვერაფერი მიშველიდა. ჰოდა, გამოსავალსაც მივაგენი: მოგეხსენებათ ახალი წელი მოდის, ახალ წელს კი ყველა თუ არა, დედამიწის მოსახლეობის სამი მეოთხედი მაინც გაუმჯობესებას და უკეთესობას ელის და ამისთვის ზოგი საათის რეკვასთან ერთად ყურძნის თორმეტ მარცვალს სანსლავს, ზოგი კი სურვილებს ქაღალდზე წერს, წვავს და მერე შამპანურთან ერთად მიირთმევს. რაც მარტივად შესასრულებელი და უსაფრთხო პროცედურა არ გეგონოთ, გარკვეულ გამოცდილებასთან ერთად მოხერხებულობასაც მოითხოვს. აბა, თავად სცადეთ, თორმეტი ყურძნის მარცვლის ზედიზედ და რიტმულად გადაყლაპვა და თან სურვილების ჩაფიქრება. ან თუნდაც ყველაზე თხელ ქაღალდზე ჩამოწიკწიკებული სურვილების ნუსხისგან დარჩენილი ნაცრის გროვის კუჭში ჩაძახება დახჩობის გარეშე.
მოკლედ, ახალი წლის ღამე ტრაგედიად რომ არ იქცეს და მსოფლიო თუ არა, ჩვენი ეკონომიკურ-სოციალური მდგომარეობა მაინც რომ გამოსწორდეს, პატარა კვლევა ჩავატარე და იღბლის, ბარაქისა და კეთილდღეობის მოსაზიდი 10 ყველაზე გავრცელებული და „საიმედო“ ტრადიცია შევკრიბე. მაშ, ასე:

10. ფეიერვერკი
ახალი წლის დამდეგს სუფრაზე ფეიერვერკი, მხიარული შეძახილები, ხმაური, კისკისი და სიმღერა თურმე ბოროტ სულებს აფრთხობს. ამიტომ, რაც უფრო მეტს იმხიარულებთ და იხმაურებთ, უფრო მეტად დაზაფრავთ უიღბლობას და უფრო მეტად გარანტირებული ბედნიერი წელი გექნებათ.


9. გადაწყვეტილებების მიღება
ითვლება, რომ პირველი იანვარი სამომავლო გეგმებზე ფიქრში უნდა გავატაროთ. რასაკვირველია, წინა დღის ლოთობის და ბოროტი სულების დასაფრთხობად ჩხავილის შემდეგ რამის თავი კიდევ თუ გვექნა. არ არის სავალდებულო, მსოფლიო მასშტაბების სტრატეგია დავსახოთ, რამდენიმე პაწია და ნაკლებადპრეტენზიული მიზნის ჩამოყალიბებაც საკმარისი იქნება. მაგალითად: დავალაგო სარდაფი, ან ორშაბათიდან ვიარო სავარჯიშოდ. 


8. ვალების დაბრუნება
ვალები 1 იანვრამდე უნდა გაისტუმროთ (!) და ახალ წელს უვალოდ და უდარდელად შეხვდეთ. უფრო მეტიც, 1 იანვარს ფულს ნუ დახარჯავთ და ნურაფერს იყიდით - ამ დღეს გასავალს ნუ დაიბედებთ.




7. შუაღამის კოცნა
თუ გინდათ რომ ახალი წელი მეწყვილეთან ერთად გაატაროთ, საათი თორმეტს ჩამოკრავს თუ არა, გვერდზე მდგომს აკოცეთ. გაითვალისწინეთ, სავალდებულო არაა, რომ ამისთვის ნებისმიერ უცნობს ეტაკოთ. მიიხედ-მოიხედეთ, მეგობარი მოძებნეთ და იმას გადაეხვიეთ.






6. სიმღერა
მთლად საშობაო ჰიმნების და ქორალების შესრულება თუ არ გეხერხებათ, იცეკვეთ მაინც.




5. მეკვლე
მეკლვლის როლზე და მნიშვნელობაზე ყველამ ყველაფერი ვიცით და კარგად დავფიქრდეთ სანამ სახლში შემოვუშვებთ. ზოგადი ინსტუქციები ასეთია: სახლის კარის საკუთარი გასაღებით გამღები მეკვლედ არ ითვლება - მას აუცილებლად უნდა გაუღონ კარი. ქალს და ქერას უბედურება მოაქვს. რაც უფრო მაღლი და შავთმიანია მამაკაცი, მით უფრო ბედნიერი და ბარაქიანი იქნება წელი. მთლად გადასარევია მეკვლე საჩუქრად პურს, ღვინოს, ხილს და მარილს თუ მოიტანს.


4. სახლიდან ნურაფერს გაიტანთ!
თუ გინდათ რომ შემოსავალმა გასავალს გადააჭარბოს 1 იანვარს სახლიდან ნუ გაიტანთ ნურაფერს. თადარიგიანი ხალხი ამ დღეს სხვაგან წასაღებ საჩუქრებს ან ნივთებს, წინასწარ ინახავს მანქანაში ან ჯერ რამე შემოაქვს და წასაღები მერე გააქვს.



3. არაფრის კეთების და დასვენების კანონი
როგორც ამბობენ, ამ დღეზე არაფრის კეთების და დასვენების კანონი მოქმედებ: ნურაფერს გარეცხავთ და წყალს იღბალს ნუ გაატანთ; ნუ დაგვით და მტვერთან ერთად ბარაქასაც ნუ გადაფერთხავთ; ნაგავს ნუ გადაყრით, შემოსავალი გაყვება... სტუმრად თუ არ მიდიხართ ან სტუმრებს  არ ელოდებით, წამოწექით და დასვენება შეირგეთ.

2. ჭამეთ!
ახალ წელს საჭმელსაც თავისი დატვირთვა აქვს, რაზეც ამ დღეებში ცალკე მოგიყვებით, მანამდე კი იღბლის მომტანი საჭმლის სია ასე გამოიყურება: ყურძენის თითო მარცვალი - თითო თვის სიმბოლოა; ღორის ხორცი - წინსვლის (ღორი მარტო წინ მიდი, უკან არასდროს იხევს), ლობიო - იღბლის, ოსპი - მონეტების და მწვანე ბოსტნეული - დოლარის. ასე, რომ იდეაში, რაც უფრო მეტ სალათის ფოთოლს შეჭამთ, მით უფრო მეტი ფული გექნებათ.

1. ახალ წელს როგორც შეხვდები, ისეთი წელი გექნება
აქ უკვე კომენტარი ზედმეტია, ახალ წელს კარგად როგორ შევხვდეთ და რა ვაკეთოთ, ამას ზედა 9 პუნქტი მივუძღვენი. ასე რომ, აბა თქვენ იცით და ამ ინსტრუქციების წყალობით, რომელიმე თუ აშენდით - გამიხსენეთ.

საუკეთესო სურვილებით, თქვენი მერი პოპინსი

0 კომენტარი.

18.12.12

ახალი წელი და ადამიანები

Approved by Natia Jinjolava


ახალი წლის თუ სეზონის დაწყებას მსოფლიოს სხვადასხვა ხალხები უხსოვარი დროიდან თავისი ტრადიციებისა და მოთხოვნილებების თანახმად განსაზღვრავენ. სურვილი და შესაძლებლობა თქვი, თორემ პირველ იანვარს რომ მივუსხდებით სუფრას, თამამად შეგვიძლია გავაგრძელოთ, ჯერ ძველით ახალ წლის, მერე ჩინური, პაკსიტანური, ინდური (ხვათა შორის, ინდოეთის სხვადასხვა შტატები ამ დღესაწაულს სხვადასხვა დროს აღნიშნავენ და მთელი მარტი გარანტირებულად დაკავებული გვექნება), ზოროასტრული, ირანული, ბენგალური, მექსიკური, ძველეგვიპტური, ებრაული, ეთიოპიური ახალი წლების აღნიშვნა და 18 ნოემბერს დავამთავროთ ჰავაის კუნძულებთან ერთად. მერე თვენახევარი დავისვენოთ და ამასობაში საკუთარიც მოგვისწრებს.
დღეისთვის, ლამის მთელ მსოფლიოს მოდებული ახალი წლის 1 იანვარს აღნიშვნის ტრადიციაც არ დამკვიდრებულა ასე მარტივად და ერთბაშად - ევროპული ქვეყნების უმეტესობა კარგა ხანს მიიჩნევდა ახალი წლის დასაწყისად 1 მარტს, 23-15 მარტს, აღდგომას, 1 სექტემბერს და 25 დეკემბერსაც კი. აღარ ვლაპარაკობ იმ ქვეყნებზე, რომლებიც დღესაც საკუთარი ლოკალური კალენდრით ცხოვრობენ და შედეგად ჩვენი დამდეგი 2013 წლის პარალელურად, ჩინელები 4698 (10 თევერვალს), ინდოელები 1922 (22 მარტს), ნეპალელები 2057 (13 აპრილს), მუსლიმები 1420 (21 ივნისს), ებარელები 5761 (15 სექტემბერს) წელს ხვდებიან. იაპონლებიც კი, რომელთა ახალი წელიც ჩვენსა ემთხვევა, 1 იანვარს კი აღნიშნავენ, მაგრამ წელთაღრიცხვა საკუთარი აქვთ და კაცმა არ იცის (რასაკვირველია, თავად იაპონლების გარდა) ახლა რომელი წელი დგება.
ცალკე სასაუბრო თემაა მსოფლიოს სხვადასხვა ხალხთა საახალწლო ტრადიციები და სიმართლე გითხრათ ამ საკითხი წამოწევას სულ არ ვაპირებდი, მაგრამ რამდენიმე იმდენად საინტერესო ტრადიციას გადავწყდი, რომ ვერ ვჩუმდები:
ახალი წელი დადგება თუ არა, შოტლანდიელი კაცები სახლიდან სასწრაფოდ გადიან და მეგობრების სახლებიკენ მიეშურებიან - ქალი მეკვლე უბედურების მომტანად ითვლება. ამიტომ, ყველა ოჯახში პირველმა კაცმა უნდა შეაბიჯოს და რაც უფრო შავია კაცი და რაც უფრო მეტი თმა-ბანჯგვლ-წვერითაა შემოსილი, მით უფრო ბედნიერი და იღბლიანი იქნება ახალი წელი.  
უნგრეთში 1 იანვარს მონეტებით სავსე აბაზანაში ბანაობენ.
დანიელებმა შესანიშნავ გასართობს მიაგნეს - ახალი წლის ღამეს მეზობლის ღობიდან ჭიშკარს ხსნიან და მისივე სახლის სახურავზე ან ახლომდებარე ხეზე ააქვთ. ვერაფერს იტყვი, ჭეშმარიტად საახალწლო და გასართობი საქმიანობაა: მთელი ღამე რომ დაბოდიალობ, მძიმე ჭიშკერბს ხსნი და მერე ხეზე აგაქვს.
ფინელები ჯერ კარგად ბანაობენ და მერე მინიმუმ ცხრაჯერ უსხდებიან მაგიდას. ყველაზე მეტი კი მასპინძელმა უნდა ჭამოს.
დანიელებზე არანაკლებ საინტერესო და სრულიად საახალწლო საქმე გამონახეს პორტუგალიაში: 31 დეკემბერს ფანჯრებს რეცხავენ, 1 იანვარს კი სარკეებს.
ქეიფს შეყოლილი აბეზარი სტურმების ზრდილობიანად თავიდან მოშორების შესანიშნავ მეთოდს მიაგნეს იაპონელებმა - ცოცხი გამოაქვთ და გამოსაჩენ ადგილას ტარით ქვევით აყუდებენ, რაც ზრდილობიან იაპონურზე დაახლოებით ასე ჟღერს: „დროზე მოცოცხეთ აქედანო“ და სტუმრებიც მორჩილად მიდიან.
კიდევ უფრო შორს წავიდნენ ფილიპინელები: ახალი წლის მეკვლეებს და მომლოცველებს ორი დღის განმავლობაში ძღომამდე აჭმევენ, მერე კი ჩვარს, ცოცხს და იატაკის ტილოს აძლევენ და სახლს ალაგებინებენ.
კამბოჯელები ახალი წლის დადგომასთან ერთად, ხელში ბარს ან ნიჩაბს იღებენ და ქვიშის გორაკების მშენებლობას იწყებენ: თითო გორაკი, თითო მონანიებულ/ნაპატიებ ცოდვას ნიშნავს. ასე, რომ რომელიმე კამბოჯელის სახლთან ძალიან ბევრ გორაკს თუ შენიშნავთ, შორიდან შემოუარეთ - აშკარაა, რომ მისი პატრონი მაინცდამაინც კარგი ხასიათით ვერ დაიკვეხნის.
ინდოეთში კი ახალ წელს განსაკუთრებულად ზრდილობიანად საუბრობენ და წინა წლის მანძილზე დაგროვებულ ვალებს აბრუნებენ...
ერთი სიტყვით, აშკარაა, რომ ახალ წელს, სადაც და როდისაც არუნდა იყოს, ყველა თავისებურად უბერავს. მაგრამ ერთი საერთო ყველას აქვს: ამ დღეს ყველა ახალი ცხოვრების დასაწყებად ემზადება, ბევრს ჭამენ, ბევრს სვამენ და ბევრს მხიარულობენ, ერთმანეთს წყენას და შეცდომებს პატიობენ, ყველა უყვართ, ცხოვრება უხარიათ და ალბათ, ეს წელიწადის ლამის ერთადერთი დღეა, როცა ყველა ადამიანი ერთნაირად კეთილი და კარგია.

საუკეთესო სურვილებით, თქვენი მერი პოპინსი

0 კომენტარი.

17.12.12

შინაური „Baileys“

Approved by Natia Jinjolava


„ბეილისი“ ჩემნაირად გიყვართ? და, თქვენც შეამჩნიეთ, რომ რაც არ უნდა დიდი ბოთლი იყოს, მაინც ძალიან მალე თავდება? მაშინ, მისი სახლში დამზადებაც არ დაგეზარებათ. მართალია, მთლად ქარხნულივით არაა, მაგრამ ძალიან გავს და რაც კიდევ უფრო მნიშვნელოვანია, ძალიან გემრიელია.



Baileys
1 ჭ წყალი, 2 ს/კ მუხის ქერქი (იყიდება აფთიაქებში), ½ ლ ირლანდიური ვისკი, 1 ქ შესქელებული რძე, 8 კვერცხის გული
მუხის ქერქს დავასხათ წყალი და ცხელი წყლი აბაზანაზე შემოვდგათ და ვადუღოთ 45 წუთი. ყურადღება! მუხის ქერქს წყლის აბაზანაზე თუ არ შემოვდგამთ, 1 ჭ წყალი პირდაპირ ცეცხლზე დუღილს 45 წყთი ვერ გაქაჩავს, ამოორთქლდება და დაიწვება! გადმოვდგათ ცეცხლიდან და გავაგრილოთ. კვერცხის გულები, მუხის ქერქის გადაწურული ნახარში, ვისკი და შესქელებული რძე გადავურიოთ ერთმანეთში და მიქსერით კარგად ავთქვიფოთ. თქვეფისას ქაფს თუ გაიკეთებს, მოვხადოთ. ჩავასხათ ბოთლებში, 2 დღე თუ არა, 2 საათი მაინც გავაჩეროთ და დავლიოთ.
ვისაც „ბეილისი“ ყავის არომატით გიყვართ, დანარჩენ ინგრედიენტებს თქვეფისას 2 ს/კ ძალიან კარგი ხარისხის ხსნადი ყავა დაუმატეთ. კარამელიანისთვის კი კარგი კარამელის მოდუღება და მისი დამატება მოგიწევთ - ძირითადი რეცეპტი ერთია.

ახლა კიდევ ერთი „წაბეილისო“ ლიქიორი ვისკით და ნაღებით:

ვისკის და ნაღების ლიქიორი
250 გრ ლერწმის შაქარი, 750 მლ ნაღები, 4 ვანილის ჩხირი ან 4 პაკეტი ვანილის შაქარი, 500 მლ ვისკი
საშუალო ცეცხლზე სქელძირიან ქვაბში ჩავყაროთ შაქარი და დავუმატოთ ნაღები. ვანილის ჩხირები ვაფატროთ შუაზე, გამოვფხიკოთ თესლი და ქერქიანად ჩავყაროთ ნაღებში, ან ჩავყაროთ ვანილის შაქარი. ვურიოთ სანამ შაქარი არ გადნება ბოლომდე და მერე გადმოვდგათ ცეცხლიდან. გავაგრილოთ და გადავწუროთ ხშირ საცერზე. ხელის სათქვეფით ჩავათქვიფოთ ვისკი. გავანაწილოთ ბოთლებში და თავსახური დავაფაროთ მჭიდროდ. ინახება 3 კვირა.

საუკეთესო სურვილებით, თქვენი მერი პოპინსი

0 კომენტარი.

16.12.12

Steak Diane - სტეიკი მონადირულად

Approved by Natia Jinjolava


ამ მეტად გემრიელ და ინგლისში საკმაოდ პოპულარულ სტეიკს „დიანა“ ნადირობის ქალღმერთის საპატივცემულოდ ქვია და გულგრილს არცერთ ხორცისმოყვარულს არ დატოვებს. ასე რომ, დღეს მის გორდონ რამზისეულ რეცეპტს გაგიზიარებთ. თუმცა, გაითვალისწინეთ, რომ ჩვენებური საქონლის ხორცი, ორიოდე სპეციალიზირებულ მაღაზიაში თუ არ შეიძენთ, შესაწვავად და მით უმეტეს, სტეიკისთვის არ გამოდგება. სტეიკს საგანგებო პირობებში მინიმუმ ორი კვირის დაძველების ხორცი ჭირდება. საქონლის ახალი ხორცი შეწვის შემდეგ მაგარია და პრაქტიკულად არ იკბიჩება. ამიტომ თამამად შეგიძლიათ მისი ღორის ხორცით ჩანაცვლება. 

Steak Diane მოთუშული კარტოფილით და მწვანე ბარდით
4 პორცია
4 დაახლოებით 200 გრამიანი სტეიკის მჭლე (ქონგაცლილი) ნაჭერი, 3 პატარა თავი ხახვი, 100 გრ ტყის სოკო, 15 გრ მარილიანი კარაქი, 1 კბილი ნიორი, 1-2 ს/კ ვორჩესტერის სოუსი, 1 ს/კ დიჟონური მდოგვი, 75 მლ ბრენდი, 225 მლ ცხიმიანი ნაღები, 1 პეშვი წვრილად დაჭრილი ოხრახუშის ფოთლები, ზეითუნის ზეთი, მარილი და პილპილი;
მოთუშული კარტოფილისთვის: 450 გრ პატარა კარტოფილები შუაზე გაჭრილი, 2 კბილი ნიორი თავისივე ტყავში, 3 ტოტი როზმარინი, 40 გრ მარილიანი კარაქი, 300 გრ მწვანე ბარდა
კარტოფილები დავმდუღროთ და მერე მარილიან მდუღარე წყალში ვხარშოთ დაახლოებით 8-10 წუთი. გადავწუროთ თუშფალანგზე და გადავდოთ გვერდზე. ცომის საბრტყელებლით გავაბრტყელოთ სტეიკის ნაჭრები და მოვაჭრათ ზედმეტი ქონი ასეთის არსებობის შემთხვევაში. ორივე მხრიდან მოვაყაროთ მარილი და პილპილი. სქელძირიან დიდი ზომის ტაფაზე (ოთხივე ნაჭერი რომ დაეტიოს) დავასხათ ძალიან ცოტა ზეითუნის ზეთი და კარგად გავახუროთ. დავბრაწოთ სტეიკის ნაჭრები თითო წუთი ორივე მხრიდან. გადმოვიღოთ ტაფიდან და გადავდოთ გვერდზე. ტაფიდან ზეთის ნარჩენები გადავწუროთ.
ავიღოთ მეორე ტაფა დავასხათ ზეითუნის ზეთი და გავაცხელოთ. გაჭრილი მხარით ქვევით დავყაროთ კარტოფილი, მოვაყაროთ მარილი და პილპილი. ნიორი თავისვე ტყავში ოდნავ დავჭყლიტოთ და დავაგდოთ ტაფაზე როზმარინის ტოტებთან ერთად. კარტოფილი რომ შეოქროსფერდება, ტაფაზე დავაგდოთ დაახლოებით 30 გრ კარაქი და კიდევ 1-2 წუთი გავაჩეროთ ცეცხლზე.
სოუსისთვის ხორცის დანაბრაწ ტაფაზე გავაცხელოთ ცოტაოდენი ზეითუნის ზეთი. დავჭრათ ხახვი და დავყაროთ ტაფაზე. ხახვი ოდნავ დარბილდება თუ არა, დავამატოთ დაჭრილი სოკო და კარაქი. დავუმატოთ დაჭყლეტილი ნიორიც, ვორჩესტერი სოუსი და მდოგვი. ვთუშოთ კიდევ 1 წუთის განმავლობაში და ავუწიოთ ცეხლს და ტაფა დავხაროთ ჩვენგან დაშორებული მხრიდან, დავასხათ ბრენდი და  დახრილი მხრიდან წავუკიდოთ ცეცხლი (ნახეთ ვიდეოზე). ოღონდ ფრთხილად, წარბები და სახე არ აიტრუსოთ! ალკოჰოლი როგორც კი დაიწვება და ცეცხლი ჩაქრება, დავუმატოთ ნაღები.  სოუსი შესქელდება თუ არა, ცეცხლ დავუწიოთ.
სტეიკის ნაჭრები დავაბრუნოთ ტაფაზე და შევწვათ ბოლომდე. დავუმატოთ ოხრახუშის ნახევარი.
მწვანე ბარდა (შესანიშნავია განაყინი) პატარა ქვაბში მოვთუშოთ დარჩენილ 10გრ კარაქთან ერთად დაახლოებით 1-2 წუთის განმავლობაში. მოვაყაროთ მარილი და პილპილი. ჭამის წინ სტეიკის ნაჭერი გადავიტანოთ თეფშზე. სოუსი მოვასხათ ზევიდან. გვერდით დავულაგოთ შემწვარი კარტოფილი და ბარდა. ბოლოს მოვაყაროთ დარჩენილი ოხრახუში.


საუკეთესო სურვილებით, თქვენი მერი პოპინსი

0 კომენტარი.

15.12.12

მასკარპონეს სემიფრედო ძალიან საშობაო განწყობისთვის

Approved by Natia Jinjolava


მასკარპონეს სემიფრედო ველერი გორდონის რეცეპტით
3 ჭ ცხიმიანი ნაღები, 2 ჩ/კ ჟელატინის ფხვნილი, ყინულივით ცივი წყალი, 12 კვერცხის გული ოთახის ტემპერატურის, 1 2/3 ჭ შაქარი, 1 ½ ს/კ ვანილის ექსტრაქტი, 400 გრ ყველი მასკარპონე, ½ ჭ ბრენდი; მოსართავად სიროპში მოხარშული ზამთრის ხილი
პატარა, სქელძირიან ქვაბში მოვათავსოთ 1 ჭ ნაღები და ჟელატინი და დაბალ ცეცხლზე შემოვდგათ და ვურიოთ სანამ ჟელატინი არ გადნება. გადავდგათ ცეცხლიდან და გავაგრილოთ. დიდ ჯამში ჩავასხათ ყინულივით ცივი (ან ყინულებჩაყრილი) წყალი. საშუალო ზომის ჯამში ავთქვიფოთ კვერცხის გულები და 1 ჭ შაქარი ვანილის ექსტაქტთან ერთად. კვერცხის გულებიანი ჯამი ცეცხლზე დადგმულ მდუღარე წყლიან ქვაბზე შემოვდგათ (ჯამის ფსკერი მდუღარე წყალს არ უნდა ეხებოდეს) და გავაგრძელოთ თქვეფა დაახლოებით 10 წუთი, მივაქციოთ ყურადღბა, რომ კვერცხის გული არ აგვიდუღდეს და არ მოგვეხარშოს. მზა კრემში თითის წვერს რომ ჩავყოფთ, კრემი ცხელი უნდა იყოს, მაგრამ არ უნდა გვწვავდეს. ჯამი ცეცხლიდან გადმოვდგათ, ყინულებიან წყალში ჩავდგათ და ვთქვიფოთ სანამ არ გაგრილდება. ცალკე ჯამში ავთქვიფოთ დარჩენილი 2 ჭ ნაღები, მასკარპონე და შაქრის დარჩენილი 2/3. წვრილ ნაკადად ჩავათქვიფოთ ჟელატინიანი ნაღებიც. მიქსერი გამოვრთოთ და ათქვეფილ კვერცხში პორცია-პორციად გადავურიოთ ათქვეფილი და გაგრილებული კვერცხის გულის კრემი და ბრენდი. ჩვენი კრემი 10 ჭიქის მოცულობის სილიკონის ფორმაში ჩავასხათ, რაც შეიძლება მჭიდროდ გადაცაკრათ ცელოფანი, ისე რომ ცელოფანი კრემის ზედაპირს ეხებოდეს და 24 საათით შევდგათ საყინულეში. 
ჭამის წინ გამოვიღოთ საყინულედან, გადმოვაყირაოთ ლანგარზე და ფრთხილად ავაცალოთ ფორმა. მოვრთოთ სიროპში მოხარშული ზამთრის ხილით.
სილიკონის ფორმა თუ არ გაქვთ, ნებიმისმიერ ფიგურულ ფორმაში ჩაასხით, გადმოყირავების წინ კი ფორმა სულ 5-10 წამით ჩადგით ცხელ წყალში და სემიფრედო ეგრევე გადმოსრიალდება. 

სიროპში მოხარშული ზამთრის ხილი
2 ჭ მშრალი წითელი ღვინო, 1 ჭ პორტვეინი, 1 ½ ჭ წყალი, ¾ ჭ შაქარი, 1 ვანილის ჩხირი სიგრძეზე გაფატრული, 20 მარცვალი პილპილი მარლაში გამოკრული, 1 დარიჩინის ჩხირი, 3 კომში, გათლილი, კურკებგაცლილი და 8 ნაჭრად გაჭრილი, 4 ნაჭერი დაკარამელებული ფორთოხალი და ¼ ჭ დაკარამელებული ფორთოხლის კანი, 8 ცალი მსხლის ჩირი შუაზე გაჭრილი, 10 ცალი ლეღვის ჩირი, ½ ჭ კურაგა, ½ ჭ ქლიავის ჩირი
დიდი ზომის სქელძირიან ქვაბში წამოვადუღოთ ღვინო და პორტვეინი. დავუმატოთ შაქარი, წყალი, ვანილი, დარიჩინი, პილპილი და კიდევ ერთხელ წამოვადუღოთ. მერე დავუმატოთ კომში და დაკარამელებული ფორთოხალი და ვადუღოთ დაბალ ცეცხლზე დაახლოებით 45 წუთი, სანამ კომში არ დარბილდება. მერე დავამატოთ დარჩენილი ჩირებიც და ვადუღოთ სანამ ხილი არ დარბილდება - დაახლოებით 15 წუთი. ამოვიღოთ დარიჩინი, ვანილი და პილპილი, ხილი კი გავაგრილოთ. იჭმევა ცხლადაც და ცივადაც.

საუკეთესო სურვილებით, თქვები მერი პოპინსი

0 კომენტარი.

14.12.12

მზე, ზღვა, ახალი წელი და კუბა

Approved by Natia Jinjolava


თქვენი არ ვიცი და ჩემთვის ახალი წელი პირდაპირ ასოცირდება თოვლთან, მწვანე ნაძვის ხესთან, ბუხართან და ჰაერში დატრიალებულ საახალწლო სუფრის არომატებთან და იმის შეგრძნებასთან, რომ გარეთ ზამთრის სუსხია და შენ კი თბილ, გაჩახჩახებულ და საზეიმოდ მორთულ ოთახში საყვარელ ადამიანებთან ერთად ფუსფუსებ. ამიტომ, ახალი წლის სახლს გარეთ შეხვედრაზე როცა ვფიქრობ, ჩემი წარმოსახვა დათოვლილი წიწვიანი ტყის, შიგნიდან კარგად გაღუღუნებული ხის კოტეჯის და ჭიქა სურნელოვანი გლინტვეინის იქით ვერ მიდის და იქვე მებადება კითვა, როგორია ახალი წელი სიცხეში ან შემიქმნის თუ არა ასეთივე თბილ განწყობას გირლიანდებით მორთული ბანანის პალმა ბრაზილიაში? არა, გართობით კი გავერთობი, ამაში ეჭვი არ მეპარება, მაგრამ ჩემი ტვინი კატეგორიულ უარს აცხადებს, ბრაზილიური საახალწლო კარნავალის საახალწლო მოვლენად აღქმაზე. აბა, წარმოიდგინეთ მინი-ბიკინიში გამოწყობილი მდედრობითი სქესის შოკოლადისფერი სანტა-კლაუსი როგორ ცეკვავს სამბას სტილზე გადაკეთებულ "კოკა-კოლის" რეკლამის მელოდიაზე.
საკუთარი ტენდენციურობის დასამარცხებლად ინტერნეტში შეძრომა და ცხელი ქვეყნების საახალწლო ტრადიციების გადაქექვა განვიზარახე და  ძიება-ძიებაში კუბას მივადექი. კუნძულს, სადაც წლიური საშუალო ტემპერატურა +26°C-ია და ზღვაში წყლის ტემპერატურა კი +24°-26°C-ზე ქვევით პრაქტიკულად არ ეცემა.
კუბური ახალი წელი შუაგულ ზამთარის სეზონზე უწევს და საკარნავალო მსვლელობების, ხმაურიანი მხიარეულებისა და ფეიერვერკეის ფონზე მიმდინარეობს. საკმაოდ ფერადოვანი და ლამაზი დღეასწაულის მთავარი ატრიბუტი კუბაზეც ჩვენი არ იყოს, საახალწლოდ მორთული ხეა, ოღონდ კუბელები ნაძვის ნაცვლად კუბურ წიწვოვან ხეს - არაუკარიას რთავენ. ეს პატარა, ოთახის დეკორატიული ნაძვის ხე ნატურალურს გარეგნულადაც და წიწვებითაც წააგავს და საკმაოდ კარგად ცვლის თავის გიგანტურ თანამოძმეს.  თუმცა, კუბაზე სათამაშოებით მორთულ კაქტუსებს და პალმებსაც ბევრგან ნახავთ. კუბელი ბავშვები კი თავის საახალწლო სურვილებით სავსე წერილებს სანტა კლაუსის ნაცვლად სამ კეთილ ჯადოქარს - გასპარს, ბალთაზარსა და მელქიორს უგზავნიან (გეცნოთ ხომ მოგვები?).
არაუკარია
ახალი წელის კუბის ერთ-ერთი უმთავრესი სახალხო დღესასწაულია, მით უმეტეს, რომ შობის აღნიშვნა მხოლოდ 1998 წლიდან დაიწყეს (მანამდე აკრძალული იყო) და ამ კუნძულზე ქრისტიანობაც არ სარგებლობს მაინცდამაინც დიდი პოპულარულობით. 31 დეკემბერს, უძველესი ტრადიციის თანახმად, კუბელები სახლში ყველა ჭურჭელს - ბოთლებს, ვაზებს, ჯამებს და ტაშტებს ზღვის წყლით ავებენ და საათის ისარი 12-ზე მივა თუ არა, ამ წყალს ფანჯრებიდან ასხამენ. რაც იმას ნიშნავს, რომ მიმავალ ახალ წელს წყალივით სუფთა და გამჭვირვალე გზას უსურვებენ. ამ ნათელი ტრადიციის წყალობით ქუჩაში გამვლელი და უმოწყალოდ გაწუწული კუბელები დიდად არ დარდობენ, დეკემბერში ხომ კუბაზე მინიმუმ 30°C სითბოა.
გარდა ამისა, კუბაზე კიდევ ერთი ტრადიციაც არსებობს: საათის თორმეტ ჩამოკვრასთან ერთად ყურძნის 12 მარცვალი უნდა ჭამოთ და 12 თვეზე  12 სურვილი ჩაიფიქროთ. რაც ადვილი საქმე სულაც არ გეგონოთ, სურვილები წინასწარ თუ არ ჩამოწერეთ და რეპეტიცია საგულდაგულოდ არ გაიარეთ, არაფერი გამოგივათ. სახვათა შორის, ზოგიერთი ცნობის თანახმად, ახალ წელს კუბის მთავარი საათი 12-ის ნაცვლად 11-ჯერ რეკავს. მეთორმეტე დარტყმა სწორედ ახალ წელსე უწევს და საათს თურმე დასვენების და ახალი წლის მშვიდად შეხვედრის საშუალებას აძლევენ.
კუბურ ახალ წელს, ჩვენი არ იყოს, ტრადიციული სადღესაწაულო კერძებიც ამშვენებს და რასაკვირველია, სახელგანთმული რომის გარეშეც არაფერი გამოვა. ოღონდ, ახალ წელს, სუფთა რომის ნაცვლად ფორთოხლის წვენით  და ძალიან ბევრი ყინულით გაზავებულს ეტანებიან.  
ახლა ორიოდე კუბური საახალწლო რეცეპტი, იქით თუ ვერ წავალთ, ჩვენს სუფრასთან მოვიტანოთ იქაური განწყობა.

ინდაურის სალათი კუბურად
200 გრ ინდაურის მოხარშული ფილე, 1 მსხვილი ფორთოხალი, 1 ვაშლი, 1-2 ს/კ არაჟანი ან ნაღები, 1 ჩ/კ ლიმონის წვენი, მარილი, წვრილად დაჭრილი კამა და ოხრახუში და ცხარე აჯიკა
ინდაურის ფილე დავჭრათ სიგრძეზე ან კუბიკებად. გავთალოთ და კურკები გავაცალოთ ვაშლს, გავფცქვნათ ფორთოხალი და ორივე დავჭრათ გრძელ ნაჭრებად ან კუბიკებად.ერთი სიტყვით, როგორ დაჭრით ნიშვნელობა არ აქვს, მთავარია ხილსაც და ინდაურსაც ერთნაირი ფორმა ქონდეს. არაჟანში გადავურიოთ აჯიკა, მწვანილი, ლიმონის წვენი და მარილი. შესუნელებულ არაჟანში ჩავყაროთ ინდაურის ხორცი, ვაშლი და ფორთოხალი და კარგად ამოვგანგლოთ. გამზადებული სალათა დავახვავით პატარა ფიალაზე და მოვრთოთ ფორთოხლის ნაჭრებით და კამის ტოტებით.

წიწილა კუბურად
2 წიწილა, 4 კბილი ნიორი, 1 თავი ხახვი, 200 მლ ქათმის ბულიონი, 80 გრ ერბო, 1 ლიმონის წვენი, მარილი, პილპილი და მწვანილი გემოვნებით
წიწილები გავრეცხოთ, შევამშრალოთ და დავჭრათ ნაჭრებად. მოვაყაროთ მარილი და პილპილი. ტაფაზე გავაცხელოთ ერბო და მოვთუშოთ წვრილად დაჭრილი ხახვი, ჩავალაგოთ წიწილის ნაჭრები და ტაფა შევდგათ ღუმელში სანამ წიწილის ხორცი სანახევროდ არ გამზადდება. მერე დავუმატოთ წვრილად დაჭრილი ნიორი, ლიმონის წვენი, ბულიონი, დავაფაროთ თავსახური და უკვე გაზქურაზე მივიყვანოთ ბოლომდე. ჭამის წინ წიწილი ნაჭრები ლანგარზე გადმოვალაგოთ და ზევიდან მისივე ნახრში სოუსი მოვასხათ. ძალიან უხდება მოხარშული ბრინჯი ან ლობიო.
კუბელები გამორჩეულად სტუმართმოყვარეები არიან და გაითვალისწინეთ, რომ მიპატიჟებაზე უარის თქმა შეურაცხყოფად ითვლება. კლასიკური კუბური ახალი წელი კი - ტროპიკული მზე,  ფირუზისფერი ზღვა, თეთრი პლიაჟები, მარჯნის რიფები და ცეცხლოვანი ლათინოამერიკული ცეკვებია.

საუკეთესო სურვილებით, თქვენი მერი პოპინსი

0 კომენტარი.
Subscribe to: Posts (Atom)