19.2.11
ნუშის და შოკოლადის ტორტი დედიკო რუსთვის
Approved by |
| დედიკო რუს პორტრეტი ტორტზე |
ჩვენი კლუბისთვის მნიშვნელოანი დღე მოდის: ხვალ დედიკო რუს დაბადების დღეა. რასაკვირველია, ამ თარიღს უყურადღებოდ ვერ დავტოვებდით და ღონისძიებაც „გამოვაცხვეთ“. ჩვენს კლუბში კი აბა რა ღონისძიება და მით უმეტეს, დაბადების დღე ჩაივლის ტორტის გარეშე.
ჰოდა, ბევრი ვიფიქრე თუ ცოტა, გადავწყვიტე ნუშის და შოკოლადის ტორტი გამეკეთებინა. ნუშის - ცოტა არაყოველდღიური რომ იყოს და შოკოლადის, დედიკო რუს პატარებმაც რომ სიამოვნებით მიირთვან.
ბისკვიტი: 5 კვერცხი, 4 ს/კ ფქვილი, 7 ს/კ შაქარი, 1 ს/კ კაკაო, 1 ს/კ დაფქული ნუში, სოდა დანის წვერზე, 2 ს/კ მდუღარე წყალი;
კრემი: 1 პაკეტი ვანილის პუდინგი, 500 მლ რძე, 6 ს/კ შაქარი, 40 გ (1 სირჩა) ლიქიორი „ამარეტო“, 200 გ კარაქი;
დასანამად: 200 მლ წყალი, 100 გ შაქარი, 40 გ ლიქიორი „ამარეტო“;
მოსართავად: 1 ფილა შავი შოკოლადი, 50 გ კარაქი და ნამცხვარი „ამარეტინი“.
5 კვერცხის ცილა ავთქვიფოთ ცოტაოდენ მარილთან ერთად, ბეზე კარგად რომ გამაგრდება, თითო-თოთოდ ჩავათქვიფოთ 5 ს/კ შაქარი. ცალკე ჭურჭელში კვერცხის გულებს დავამატოთ 2 ს/კ შაქარი და 2 ს/კ მდუღრე წყალი და სწარაფად ავთქვიფოთ (მდუღარე წყალი ჩაასხით თქვეფის პროცესში, თორემ შეიძლება კვერცხი შეიკრას და მოიხარშოს!). ზომაში 2-3-ჯერ გაზრდილი გულების მასა ჩავათქვიფოთ ბეზეს და თითო-თითო კოვზად ფრთხილად გადავურიოთ ფქვილის, კაკაოს, სოდისა და ნუშის მასა. ჩავასხათ ფორმაში და გამოვაცხოთ. კარგ ღულემში დაბალ ცეცხლზე ტორტის ბისკვიტი დაახლოებით 40-45 წუთში ცხვება.
1 პაკეტ ვანილის პუდინგს დავუმატოთ 6 ს/კ შაქარი და 6 ს/კ რძე და კარგად გავხსნათ. დარჩენილიი რძე ავადუღოთ და ჩავურიოთ პუდინგის მასას. მორევა-მორევით მივიყვანოთ ადუღებამდე, გადმოვდგათ გაზიდან და გავაციოთ. გაციებული ჩავათქვიფოთ ათქვეფილ კარაქში და დავუმატოთ „ამარეტო“.
200გ წყლის და და შაქრისაგან მოვადუღოთ საშუალო სისქის სიროპი. გაციებულს დავუმატოთ „ამარეტო“. ცხელში თუ ჩაამტებთ ლიქიორს, მთელი ალკოჰოლი ამოორთქლდება!
წყლის აბაზანაზე გავადნოთ შოკოლადი და კარაქი.
 |
| "ანარეტინები" |
ბისკვიტი გავჭრათ სამ ნაწილად. პირველი ფენა დავნამოთ კარგად, წავუსვათ კრემის ერთი მესამედი. კრემზე დავალაგოთ ნამცხვარი „ამარეტინი“. დავადოთ მეორე ფენა და იგივე გავიმეოროთ. თავზე დავახუროთ მესამე ფენა და დავნამოთ. დარჩენილი კრემის ნაწილი წავუსვათ გვერდებზე. სულ ცოტა კრემი მოსართავად შევინახოთ. ტორტს თავზე გამდნარი შოკოლადი წავუსვათ და „ამარეტინებით“ მოვრთოთ.
რამდენიმე რჩევა: „ამარეტინების“ ნაცვლად შეგიძლიათ იხმაროთ დაჭრილი ნუში, მაგრამ ასე ბევრად უფრო პიკანტურია და „ამარეტოს“ შეცვლაც შეიძლება ნუშის ესენციით. ოღონდ, მაშინ რაიმე ნეიტრალურსუნიანი ალკოჰოლი დაგჭირდებათ დამატებით. ან ტორტს ბავშვებისთვის თუ აკეთებთ, ალკოჰოლს საერთოდ ნუ ჩაურევთ.
ისეთი სუნი ასდის, ერთი სული მაქვს, ხვალ როდის დავჭრი!
საუკეთესო სურვილებით, თქვენი მერი პოპინსი
0 კომენტარი.:
Post a Comment