კიდევ ერთი აზერბაიჯანული კერძი - დოვღა

Approved by Mary Poppins



დოვღა  აზერბაიჯანული მაწვნის წვნიანია,  ყვითელი ბარდით, აი რუსულად რომ   ГОРОХ-ს უწოდებენ, აზერბაიჯანელები კი ნოხუდის. უგემრიელესია, ყოველ შემთხვევაში მე ძალიან მიყვარს მისი უხორცო ვარაიანტი. ბებიაჩემსაც ძალიან უყვარდა და ხშირად აკეთებდა, დედაჩემი კი მაინცდამაინც არ წყალობს.
ერთხელ ბებიაჩემის და (ჩვენი საზოგადოებისთვის საკმაოდ ნაცნობი პიროვნების ბებია), რომელიც  სოხუმში ცხოვრობდა, ჩვენთან სტუმრად იყო ჩამოსული, დოვღა მოენატრა და ბებიას სთხოვა: „კაკილა, ერთი შენ რომ აზერბაიჯანული თოხარიკი იცი, ის გააკეთეო!“ თოხარიკი გურულად ცხენის ჭენებას, ანუ მისთვის დოღს ნიშნავდა დოღი, კი დოვღას  ჰგავს ჟღერადობით. და ჩვენც, იმ დროიდან მოყოლებული დღემდე, სახლში ამ კერძს თოხარიკად მოვიხსენიებთ.

უხორცო დოვღა
პირველ რიგში, კერძის მომზადების დაწყებამდე მინიმუმ 3-4 საათით ადრე უნდა გავარჩიოთ ბარდა (ყვითელი) და დავალბოთ ცივ წყალში, მერე გავაცალოთ კანი, ჩავყაროთ მდუღარე წყალში და მოვხარშოთ ნახევრად მზადყოფნამდე.
ცალკე ქვაბში გავთქვიფოთ მაწონი და ნელ–ნელაб მუდმივი მორევის პარალელურად ვამატოთ ფქვილი, რათა არ დაკურკუტდეს, ან არ აიჭრას. ნელი და მუდმივი მორევით მიგვყავს დუღილამდე, ვამატებთ ნახევრადმოხარშულ ბარდას, ბრინჯს და წვრილად დაჭრილ ხახვს. სრულ მომზადებამდე ცოტა ხნით ადრე ვამატებთ დაჭრილ მჟაუნას, ისპანახს, ქინძს, კამას, მარილს და ვადუღებთ მზადყოფნამდე.
უხორცო დოვღას მომჟაო და ძალიან არომატული გემო აქვს.
კიდევ ამბობენ, რომ უხორცო დოვღას მომზადების სულ ბოლო ეტაპზე შეიძლება დავუმატოთ მოხარშული და დაჭრილი კვერცხი, პორციაზე დაახლოებით 10 გრ.
კიდევ, რასაც აზერბაიჯანში აკეთებენ და ჩვენ არასდროს გაგვიკეთებია, სუფრასთან გატანის წინ ყოველ ულუფას თავზე გამდნარ კარაქს ასხამენ, როგორც ჩვენ საცივზე  ნიგვზის ზეთის მოსხმა ვიცით ისე.
ინგრედიენტები ერთი პორციისთვის: (როგორც ყოველთვის ძველი ჯადოსნური წიგნიდან, თორემ სახლში ესეც თვალის ზომით კეთდება):


მაწონი
200
გამდნარი კარაქი
10
ბრინჯი
20
ბარდა
25
ხორბლის ფქვილი
5
ხახვი
18
მჟაუნა და ისპანახი
50
ქინძი, კამა
30
მარილი                      
5



დოვღა ხორცით

ძვლებისაგან მზადდება ბულიონი, ხორცს  და თავ ხახვს ატარებენ ხორცისაკეპ მანქანაში, უმატებენ პილპილს, ამზადებენ პატარპატარა დაახლოებით 15 გრამიან ბურთულებს და ხარშავენ წინასწარ მომზადებულ ბულიონში, რომ შემდეგ მორევის დროს არ დაიშალოს.
აქაც, როგორც უხორცო დოვღის შემთხვევაში, 3–4 საათით არდე ალბობენ ბარდას და ხარშავენ.
გათქვეფილ მაწონს, ნელ–ნელა უმატებენ ფქვილს მიჰყავთ ადუღებამდე, ამის შემდეგ უმატებენ ბარდას, ბრინჯს, ხორცის ბურთულებს, ბულიონს და ადუღებენ. მზადყოფნამდე ცოტა ხნით ადრე ამატებენ მწვანილსა და მარილს.
იმ ჩვენ  ძველ და ჯადოსნურ წიგნში ასე წერია, რომ წელიწადის დროიდან გამომდინარე სუფრასთან შეგიძლიათ ცივიც მიიტანოთო. ვისაც რისკი გიყვართ, შეგიძლიათ გასინჯოთ, პირადად მე, ცივ წვნინაში შედედებულ–შესქელებულ ცხოველური ცხიმების დაგემოვნება ძნელად წარმომიდგენია, არ ვარ მე მაგდენად აზიელი!

  ინგრედიენტები:

ცხვრის ხორცი
 100
მაწონი
200
ბრინჯი
20
ბარდა
15
ხორბლის ფქვილი
10
ხახვი
12
მჟაუნა და ისპანახი
53
ქინძი და კამა
30
დაფქული პილპილი
გემოვნებით
მარილი                      
გემოვნებით


კეთილი სურვილებით, ეკა გობრონიძე

0 კომენტარი.:

Post a Comment