21.12.11
მეგრული საცივი
Approved by
გამოცდილ დიასახლისებს თუ დავუჯერებთ, მეგრული საცივის მომზადებას კულინარიული
აკადემიის თუ არა, კოლეჯის დამთვარება მაინც სჭირდება. იმერული საცივისგან განსხვავებით,
მეგრულის წვენი არ იხარშება და გაცხელებას არ ექვემდებარება და უფრო ბაჟეს წააგავს.
მისი კიდევ ერთი მთავარი განსხვავეა ფერშია: მეგრული საცივი მაქსიმალურად თეთრი (რეალურად ძალიან
ბაცი მოვარდისფრო-მოკრემისფრო) უნდა იყოს. ამისთვის მონდომებული დიასახლისები ყველაზე
თეთრ ნიგოზს ყიდულობენ, მერე ხორცსაკეპ მანქანაში ატარებენ და ამის მერე იწყება აბსოლუტურად
მაზოხისტური მოქმედება. უკვე გატარებულ და დაქუცმაცებულ ნიგოზს ყველაზე წვრილ ალუმინის
ბადიან საცერში ატარებენ. როგორც ირწმუნებიან, ასე ნიგოზი განსაკუთრებულად ფაფუკი და
ჰაეროვანი გამოდის. დამიჯერეთ, ამ საკმაოდ
შრომატევადი და მტკივნეული ოპერაციის მერე ხელისგული გადატყავებული არა, მაგრამ დაკოჟრილი აშკარად რჩება. საცივისთვის თეთრი ფერის შესანარჩუნებლად
სანელებლებში ზაფრანას ოდენობა მინიმუმამდეა დაყვანილი და ხმელი წითელი წიწაკისას მხოლოდ
დაფქულ თესლს იყენებენ (რომელიც თეთრი ფერისაა), წითელმა წინწკლებმა საერთო შთაბეჭდილება
რომ არ გააფუჭოს. ვისაც საკუთარი თავი და განსაკუთრებით მარჯვენა ხელი გიყვართ, შეგიძლიათ
მძიმე შრომა მინიმუმამდე დაიყვანოთ - დაბლენდერებული ნიგოზი თითქმის ისეთივე ჰაეროვანი
და ნაზია, როგორც საცერში გატარებული, ამიტომ შეგიძლიათ თავი არ შეიწუხოთ. ასევე, ბლენდერში
პორცია-პორციად გათქვიფეთ ბულიონი, ნიგოზი და სენელებლები და მერე ერთ ჯამში აურიეთ
ერთმანეთში.
მოკლედ, გასუფთავებული და გარეცხილი ინდაური მოვხარშოთ, მერე მსხვილი მარილი
მოვაყაროთ შიგნიდან და გარედან და ღუმელში შევდგათ დასაბრაწად. ინდაურის ნახარში ბულიონი
შევინახოთ.
ახლა საკმაზი მოვამზადოთ: დიდი ზომის მამალ ინდაურს დაახლოებით კილო ნიგოზი
ჭირდება, უფრო მომცრო დედალს 700 გრამიც ყოფნის. შევარჩიოთ საჭირო ოდენობის თეთრი,
საღი და ცხიმიანი ნიგოზი, გადავარჩიოთ და დავაბლენდეროთ, ვისაც სურვილი გაქვთ, საცერშიც
გაატარეთ. პატარა ქვაბით ავადუღოთ წყალი და 2 საშუალო ზომის ხახვი და 2 ცალი პრასის ძირი (თეთრი ნაწილი) ვხარშოთ 3 წუთის
განმავლობაში და მერე ძალიან წვრილად დავჭრათ ან დავნაყოთ. დიდი ჯამში ჩავყაროთ გატარებული
ნიგოზი, დაჭრილი ხახვი და პრასი, დაახლოებით თითო ატარა ჭიქა (100 გრამიანი) ან ჭიქანახევარი
ხმელი ქინძი, ხმელი უცხო სუნელი და ნახევარი ჭიქა ხმელი ზაფრანა. ნიგოზი სუნელებთან
ერთად ხელით კარგად დავსრისოთ. რაც მეტხანს მოვზელთ მით უკეთესია და მისგან პატარა
(დაახლოებით ბავშვის მუშტისხელა) გუნდები გავაკეთოთ. ცალკე ქვაბში ჩავასხათ 1 წილი
ინდაურის ბულიონი და 2 წილი წყალი (რამდენი წვენიც გვჭირდება იმისდა მიხედვით) და სათითაოდ
დავიწყოთ ნიგვზის გუნდების გახსნა და მორევა. თბილ წყალში გავხსნათ დაჭყლეტილი 2 კბილი
ნიორი და წიწაკის თესლი გემოვნებით, 2 წუთი გავაჩეროთ და გადავწუროთ, და ნაწური ჩავასხათ
საცივში. დავუმატოთ მარილი. გავსინჯოთ და საჭიროების შემთხვევაში დავუმატოთ სანელებლები,
მარილი ან წიწაკა. ინდაური დავჭრათ. დიდ ქვაბში ფენა-ფენად ჩავალაგოთ ხორცი და ფენებს
შორის მოვასხათ საცივის წვენი. საცივი მეორე დღისთვის თუ გვინდა, წვენი ცალკე ქილაში
შევინახოთ და მერე დავასხათ ხორცს, თორემ ინდაური სოუსს იწოვს და სქელდება. ამიტომ
დასამატებლად გადანახული ცოტა სოუსი ისედაც არ გვაწყენს.
მეგრულ საცივს ღრმა თეფშზე ასხამენ
და მერე მის სოუსს რამდენიმე წვეთ ნიგვზის ზეთს აწუწავენ სილამაზისთვის. ნიგვზისგან
ზეთის დაწურვა ადრე საკმაოდ შრომატევადი სამუშაო იყო (ძალიან დიდხანს უნდა სრისო) და
გამჭრიახმა დიასახლისებმა ასეთ მარტივ გამოსავალს მიაგნეს, პატარა ჭიქაში ერთმანეთში
ურევენ 2ს/კ ნებისმიერ უსუნო რაფინირებულ ზეთს და 0,5 ჩ/კ ტომატ-პასტას. ზეთი ძალიან
ლამაზ მოწითალო ფერს ღებულობს. არსებობს კიდევ უკეთესი გამოსავალი - ჩვენს სუპერმარკეტებში
უკვე იყიდება ნიგვზის ზეთი, რომელსაც ფერის გარდა, არაჩვეულებრივი არომატიც აქვს.
საუკეთესო სურვილებით, თქვენი მერი პოპინსი
0 კომენტარი.:
Post a Comment