4.2.11
გზააბნეული ტურისტის პატარ-პატარა უსიამოვნებანი
Approved by
არა რა, ჩემი გაშვება უცხო ქალაქში რუკის გარეშე არ შეიძლება. ისევ დავიკარგე! უცხო ქალაქში გზის დაბნევას არა უშავს და მშობლიურ ქალაქში ასეთი სამარცხვინო „კაზუსები“ რამდენჯერ დამმართია. ერთი ჩემი მეგობარი ამ თვისებას „ტოპოგრაფიულ იდიოტიზმს“ ეძახის და მართალიცაა. ნებისმიერ ქალაქში მოძრაობისთვის რაღაც ორიენტირი მჭიდება. თბილისში ასეთი, რაღა თქმა უნდა, სატელევიზიო ანძაა. ვაი ჩემს თავს, ისეთ უბანში თუ მიწევს მისვლა, საიდანაც ეს ოხერი ანძა არ ჩანს! აი, მაშინ უნდა მნახოთ, კომპასიც შემომაშველოთ და ხელჩაკიდებული გამომიყვანოთ. თუმცა ერთხელ სწორედ ამ ანძის ქვეშ დავიკარგე, სოლოლაკიდან კონსერვატორიაში მისვლა მოკლე გზით გადავწყვიტე და სულ გადამავიწყდა, რომ მთაწმინდაზე გაუთავებელი მშენებლობების გამო „ლანდშაფტი“ სრულიად შეიცვალა. მოკლედ, სადღაც ზევით, ისეთ ადგილას რომ აღმოვჩნდი, საიდანაც დავინახე, რომ მეცნიერებათა აკადემიის შპილსაც გვარიანად გამოვცდი, მივხვდი, რომ კონსერვატორიაც და კონცერტიც უკან მომიტოვებია.
ჩემნაირი ადამიანისთვის ვენეციაში სეირნობა მოსწრებაა - მახსოვს, ტურისტულ და ხალხმრავალ მარშრუტს აცდენილი, ხიდის ძებნა-ძებნაში ერთიდაიგივე ადგილას გამოვდიოდი, საიდანაც ეს ოხერი ხიდი ხელის გაწვდენაზე იყო, მაგრამ ერთმანეთისგან არხი გვყოფდა..
აი, კიდევ ერთი ისტორია: ჩემი მეგობარი ახლობლებთან ერთად სადღაც დუშეთთან პიკნიკზე გახლდათ. ტყეში ბლომად შინდი დაუკრეფიათ. მანქანებიკენ სავსე კალათებით მიმავლებს რუსი ტურისტების ჯგუფი შეხვედრიათ და რაღაც უკითხავთ. ერთ-ერთ მოპიკნიკეს რუსული ცუდად სცოდნია, მაგრამ პასუხი ამაყად და თავდაჯერებულად გასცა. თურმე ტურისტებს ის უკითხავთ, შინდი სად დაკრიფეთო... მოპასუხე «Кизил»-სა და «Кизик»-ს შორის დიდად ვერ გაერკვია და ქიზიყის გზა დაწვრილებით მიასწავლა. მოკლედ, გაუშვა მიუსავლეთში...
როგორც წესი, მსგავსი თავგადასავლების გმირებს იმ წუთას არ ეღიმებათ, მაგრამ მერე, როცა დრო გავა, თავსგადამხდარ ისტორიებს ხალისით და ღიმილით იხსენებენ. ამიტომ, სამოგზაუროდ წამსველებს გირჩევთ: მთავარი - იუმორის გრძობა სახლში არ დაგავიწყდეთ! გზის აბნევა-აცდენის და დაკარგვის შემთხვევაში, ის ნებისიერ რუკაზე, გზამკვლევზე და კომპასზე უკეთესი მეგზურია!
საუკეთესო სურვილებით, თქვენი დეიდა პოლი
1 კომენტარი.:
http://www.zdr.ru/hots/2008/06/30/topograficheskii-kretinizm-eto-lechitsja/index.html
მაგრად იხალისებ! თურმე ტოპოგრაფიული კრეტინიზმიც ქალების დაავადება ყოფილა :)
Post a Comment